GREENDT LOYIHASINING 4-LOYIHA UCHRASHUVI YAKUNLANDI

16–18-sentabr 2026-yil kunlari Toshkent Kimyo xalqaro universiteti (KIUT) “Mashinasozlik texnologiyasi” kafedrasi vakillari Portugaliyaning University of Aveiro (UAveiro) universitetida bo‘lib o‘tgan GREENDT loyihasining 4-Project Meeting uchrashuvida ishtirok etdilar.

Uchrashuv davomida loyiha doirasida amalga oshirilayotgan ishlar, O‘zbekistonda “Atrof-muhit muhandisligi” yo‘nalishida zamonaviy magistratura ta’limini rivojlantirish hamda xalqaro akademik hamkorlikni mustahkamlash masalalari muhokama qilindi.

Loyiha doirasidagi muhim natijalar:

• KIUTda “Atrof-muhit muhandisligi” magistratura dasturi yo‘lga qo‘yildi. Shuningdek, zamonaviy laboratoriya bazasini rivojlantirish, e-learning platformasini shakllantirish va xalqaro akademik hamkorlikni kengaytirish bo‘yicha ishlar olib borilmoqda.
• KIUT va UAveiro o‘rtasidagi Memorandum asosida, Erasmus+ ICM loyihasi doirasida KIUT magistranti uchun UAveiroda bir semestrlik akademik almashinuv imkoniyatini yaratish bo‘yicha kelishuvga erishildi.

GREENDT loyihasi O‘zbekistonda zamonaviy muhandislik ta’limi, barqaror rivojlanish va xalqaro akademik hamkorlikni rivojlantirishga qaratilgan.