EMINReM Erasmus+ loyihasi Satbayev universitetida yakuniy muvofiqlashtirish yig‘ilishi va xalqaro konferensiya bilan muvaffaqiyatli yakunlandi

2026-yil 11–15-may kunlari Qozog‘istonning Satbayev universitetida Erasmus+ Oliy ta’lim salohiyatini oshirish (CBHE) loyihasi "EMINReM – Eco-Mining and Innovative Natural Resources Management (Ekologik konchilik va innovatsion tabiiy resurslarni boshqarish bo‘yicha magistrlik dasturi)" ning yakuniy muvofiqlashtirish yig‘ilishi va xalqaro konferensiyasi bo‘lib o‘tdi.

Mazkur tadbirda Qozog‘iston, O‘zbekiston, Ukraina, Germaniya, Ispaniya va Turkiyaning oliy ta’lim muassasalari hamda sanoat korxonalari vakillari ishtirok etib, uch yil davomida amalga oshirilgan loyiha natijalarini sarhisob qildilar hamda konchilik ta’limini modernizatsiya qilish va xalqaro hamkorlikni yanada rivojlantirish istiqbollarini muhokama qildilar.

EMINReM loyihasi so‘nggi uch yil davomida ekologik konchilik va innovatsion tabiiy resurslarni boshqarish yo‘nalishidagi magistratura ta’lim dasturlarini Yevropa standartlari asosida modernizatsiya qilish, ularni zamonaviy konchilik sanoati ehtiyojlariga moslashtirish hamda muhandislik ta’limiga fanlararo yondashuvni joriy etishga qaratilgan. Loyiha doirasida muhandislik fanlari bilan bir qatorda ekologiya, axborot texnologiyalari va menejment yo‘nalishlari ham o‘quv dasturlariga integratsiya qilindi.

Konferensiya davomida loyiha koordinatori va hamkor universitetlar vakillari Erasmus+ dasturi doirasida erishilgan muhim natijalarni ta’kidladilar. Jumladan, hamkor universitetlarda magistratura o‘quv dasturlari yangilandi, zamonaviy o‘quv-uslubiy materiallar ishlab chiqildi, raqamli ta’lim yechimlari joriy etildi, laboratoriyalar zamonaviy uskunalar bilan jihozlandi hamda professor-o‘qituvchilarning malakasi Yevropa universitetlarida tashkil etilgan trening va akademik mobillik dasturlari orqali oshirildi.

Xalqaro konferensiya konchilik sanoatini raqamlashtirish, tabiiy resurslardan barqaror foydalanish, ekologik muhofaza, muhandislik ta’limini rivojlantirish hamda universitet va sanoat korxonalari o‘rtasidagi hamkorlikni mustahkamlash masalalari yuzasidan tajriba almashish uchun muhim platforma bo‘lib xizmat qildi.

Konferensiya dasturi doirasida ishtirokchilar raqamli texnologiyalarni konchilik sanoatiga joriy etish, ekologik yechimlar, yerlarni rekultivatsiya qilish, mutaxassislar tayyorlashning innovatsion yondashuvlari hamda ilmiy hamkorlik istiqbollari bo‘yicha yalpi va sho‘ba sessiyalarida qatnashdilar. Shuningdek, Satbayev universitetining zamonaviy ilmiy laboratoriyalari va tadqiqot infratuzilmasi bilan yaqindan tanishish imkoniyatiga ega bo‘ldilar.

EMINReM loyihasining muvaffaqiyatli yakunlanishi Erasmus+ dasturining xalqaro akademik hamkorlikni rivojlantirish, oliy ta’lim sifatini oshirish va muhandislik ta’limini zamonaviy talablar asosida modernizatsiya qilishdagi muhim o‘rnini yana bir bor namoyon etdi. Loyiha, shuningdek, Birlashgan Millatlar Tashkilotining Barqaror rivojlanish maqsadlari, xususan Sifatli ta’lim (SDG 4), Sanoat, innovatsiyalar va infratuzilma (SDG 9) hamda Mas’uliyatli iste’mol va ishlab chiqarish (SDG 12) maqsadlariga erishishga ham munosib hissa qo‘shmoqda.

O‘zbekistondagi Milliy Erasmus+ Ofisi EMINReM loyihasi konsorsiumining barcha hamkorlarini loyiha muvaffaqiyatli yakunlangani bilan samimiy tabriklaydi hamda xalqaro hamkorlik orqali oliy ta’limda innovatsiyalarni, barqaror rivojlanishni va sifatni oshirish yo‘lidagi sa’y-harakatlarini yuksak qadrlaydi.

Manba: https://satbayev.university/en/news/eminrem-international-project-has-completed-three-years-of-work-on-modernizing-the-mining-education-with-satbayev-university-conference