Erasmus+ dasturining 2027-yil uchun yillik ish dasturi e’lon qilindi

Mazkur hujjat Yevropa Ittifoqining ta’lim, kasbiy tayyorgarlik, yoshlar va sport sohalariga qaratilgan Erasmus+ dasturining 2027-yil uchun yillik ish dasturi va moliyalashtirish to‘g‘risidagi qarorini belgilaydi.

Hujjatda dasturning asosiy maqsadlari, amalga oshirish tuzilmasi, ustuvor yo‘nalishlari hamda bevosita va bilvosita boshqaruv doirasidagi faoliyatlari, jumladan, ta’lim va kasbiy tayyorgarlik, yoshlar, sport va Jean Monnet faoliyatlari batafsil yoritilgan.

2027-yilda Erasmus+ dasturi uzluksiz ta’limni qo‘llab-quvvatlash, shaxsiy va kasbiy rivojlanish, ijtimoiy birdamlik, innovatsiyalar, Yevropa o‘zligini anglash hamda faol fuqarolik pozitsiyasini rivojlantirishga qaratilgan.

Shuningdek, dastur inklyuzivlik va keng ishtirokni ta’minlash, yoshlarning demokratik jarayonlardagi faolligini oshirish, ta’lim va kasbiy tayyorgarlik tizimlarining barqarorligini mustahkamlash, raqamli transformatsiyani rivojlantirish hamda tegishli asoslar mavjud bo‘lgan hollarda uchinchi davlatlar bilan hamkorlikni kengaytirishga ustuvor ahamiyat beradi.

Qarorga muvofiq, 2027-yil uchun Yevropa Ittifoqining Erasmus+ dasturiga ajratadigan maksimal moliyaviy hissasi 6 212 985 300 yevro etib belgilangan. Ushbu mablag‘lar ta’lim va kasbiy tayyorgarlik, yoshlar, sport, NDICI – Global Europe hamda IPA III doirasidagi asosiy budjet yo‘nalishlari bo‘yicha taqsimlanadi.

Batafsil ma’lumot bilan rasmiy hujjatda tanishishingiz mumkin.

Erasmus+ dasturi doirasidagi yangi tanlovlar tez orada e’lon qilinadi. O‘z imkoniyatingizni qo‘ldan boy bermang!