SURXONDARYODA ERASMUS+ AXBOROT VA METODOLOGIK SEMINARI BO‘LIB O‘TDI

1-aprel kuni Termiz davlat universitetida Erasmus+ axborot va metodologik seminari Oliy ta’lim, fan va innovatsiyalar vazirligi, Yevropa Ittifoqining O‘zbekistondagi delegatsiyasi, O‘zbekistondagi Milliy Erasmus+ ofisi hamda Termiz davlat universiteti bilan hamkorlikda muvaffaqiyatli tashkil etildi. Unda Surxondaryo viloyati va unga yaqin hududlardagi oliy ta’lim muassasalari vakillari ishtirok etdi.

Tadbirning asosiy maqsadi Erasmus+ dasturi imkoniyatlari haqida xabardorlikni oshirish hamda ishtirokchilarning loyiha ishlab chiqish va xalqaro hamkorlik bo‘yicha bilimlarini mustahkamlashdan iborat bo‘ldi.

Seminar davomida ishtirokchilar:

• O‘zbekistondagi Erasmus+ imkoniyatlari bilan tanishdilar
• CBHE loyihalari uchun kuchli loyiha takliflarini ishlab chiqish bo‘yicha tavsiyalar oldilar
• Erasmus Mundus qo‘shma magistratura dasturlari va Erasmus+ Alumni tarmog‘i haqida ma’lumotlarga ega bo‘ldilar
• Amaldagi CBHE loyihalari (PAWER, INTRAS, TRIGGER) misolida ilg‘or tajribalarni o‘rgandilar
• Erasmus+ akademik mobillik dasturlari haqida batafsil ma’lumot oldilar

Sessiyalar Milliy Erasmus+ Ofisi, Yevropa Ittifoqi delegatsiyasi, HEREs ekspertlari va hamkor oliy ta’lim muassasalari vakillari tomonidan olib borildi. Seminar doirasida Erasmus+ imkoniyatlariga bag‘ishlangan viktorina ham o‘tkazilib, ishtirokchilarning bilimlari interaktiv tarzda sinovdan o‘tkazildi.