O‘zbekiston – Yevropa Ittifoqi: Bryusselda ta’lim va sog‘liqni saqlash bo‘yicha muhim muloqotlar

25–26-fevral kunlari Bryussel shahrida O‘zbekiston delegatsiyasining Yevropa Ittifoqi institutlariga tashrifi doirasida muhim uchrashuvlar bo‘lib o‘tdi.

Senator Orol Aminovna Ataniyazova “Islohotlar va hamkorlik: O‘zbekiston va Yevropa Ittifoqining yangi kun tartibi” mavzusidagi davra suhbati hamda “Yevropa Ittifoqi – O‘zbekiston Respublikasi” Parlament hamkorligi qo‘mitasining 19-yig‘ilishida ishtirok etdi.

Uchrashuv davomida quyidagi masalalar muhokama qilindi:

• Ta’lim sohasidagi islohotlar natijalari – oliy ta’lim tizimidagi modernizatsiya jarayonlari va xalqaro hamkorlikning kengayishi;

• Sog‘liqni saqlash tizimidagi yangilanishlar – aholiga ko‘rsatilayotgan tibbiy xizmat sifatini oshirish va tizimli islohotlar samarasi;

• Yoshlar salohiyati – aholining qariyb 60 foizini tashkil etuvchi yoshlar kuchi, yangi avlod talabalari va yosh olimlarning shakllanishi;

• Xalqaro dasturlarni kengaytirish zarurati – Erasmus+ va Horizon Europe doirasida O‘zbekiston uchun moliyalashtirish hajmini oshirish taklifi;

• O‘smirlar salomatligi va farovonligi – global miqyosda eng zaif toifalardan biri bo‘lgan o‘smirlarni qo‘llab-quvvatlashga qaratilgan xalqaro normativ hujjat ishlab chiqish tashabbusi.

Mazkur uchrashuvlar O‘zbekiston va Yevropa Ittifoqi o‘rtasida fan, ta’lim va sog‘liqni saqlash sohalaridagi hamkorlikni yanada mustahkamlashga xizmat qiladi.